- ट्रेण्डिङ:
प्रतिनिधिसभा विघटनविरुद्ध कांग्रेसका शुभेच्छुक संस्थाहरूले माघ २४ गते खोटाङमा विरोध प्रदर्शन गर्ने भएका छन् । प्रधानमन्त्री केपी शर्मा ओलीको प्रतिनिधिसभा विघटन गर्ने कदमका विरुद्ध शुभेच्छुक संस्थाहरूले शनिवार प्रदर्शन गर्ने भएका हुन् ।
नेपाल शिक्षक संघ खोटाङका अध्यक्ष शिवहरी ढकालका अनुसार कांग्रेसका शुभेच्छुक संस्थाहरूले शनिवार दिउसो १२ बजे देखि १२ः३० सम्म आधा घण्टा दिक्तेलको त्रिवेणी चौकमा विरोध प्रदर्शन गर्ने भएका हुन् । प्रतिनिधिसभा विघटन गर्ने कदम र ओली नेतृत्वको सरकारका तीन वर्षका बेथितिलाई समेत मुद्दा बनाइने अध्यक्ष ढकालले बताए ।
नेपाली कांग्रेसको केन्द्रीय कार्यालय सानेपामा गत मंगलवार बसेको केन्द्रीय समितिको बैठकले प्रतिनिधि सभा विघटनको विरोधमा शुभेच्छुक संस्थाले ७७ वटै जिल्लामा संयुक्तरुपले विरोध प्रदर्शन र विरोधसभाको आयोजना गर्ने निर्णय गरेको थियो ।
