- ट्रेण्डिङ:
खोटाङ । खोटाङको रावाबेँसी गाउँपालिकाका किसानले रोपेको धान बालीमा फड्के किरा (राइस होपर) को प्रकोप फैलिएको छ । रावाबेँसी गाउँपालिका–४ डुम्रेधारापानी, रावाबेँसी गाउँपालिका–२ खार्पाको रावा खोला किनार आसपासका खेतमा रोपिएको चैते धान बालीमा फड्के किराको प्रकोप फैलिएको हो ।
डुम्रेधारापानीको बेँसी क्षेत्रमा पर्ने कटहरेमा पसाउने बेलाका धान बाली पहेँलो हुँदै जाने र मर्ने समस्या देखिएको जानकारी आएपछि कृषि प्राविधिक पठाएर समस्याको कारण फड्के किरा भएको पहिचान गरिएको गाउँपालिकाका कृषि शाखा संयोजक मुगाधन राईले बताए ।
गाउँपालिकाको जलजले, चालिसे, टारी, हौंचुरबेँसी, आम्बोटे लगायतका ठाउँबाट पनि धानमा फड्ने किराको प्रकोप फैलिएको बारेमा जानकारी आउन थालेको गाउँपालिकाले जनाएको छ ।
फड्के किराको आक्रमणका कारण हालसम्म करिब ६ सय हेक्टरभन्दा बढि क्षेत्रका धान बाली पहेँलो भएर सुक्न थालेको किसानको गुनासो छ । मूख्य बालीका रुपमा रोपिएको धानमा फड्के किराको प्रकोप फैलिएपछि किसान चिन्तित छन् । फड्के किराले धानको गाँजमा बसेर चुस्न थालेपछि बोट पहेँलो हुँदै जाने र मर्ने गरेको कृषि प्राविधिकको भनाई छ ।
धान बालीमा फैलिएको फड्के किरा नियन्त्रणका लागि विषादि वितरण गरेर प्रभावित क्षेत्रमा छर्न सुरु गरिएको कृषि शाखा संयोजक राईले बताए ।
