- ट्रेण्डिङ:
खोटाङ । विद्यालय शिक्षा सम्बन्धी कानूनलाई संशोधन र एकीकरण गर्न बनेको विधेयकको विरोधमा सहभागी हुन खोटाङका पाँच सय शिक्षक काठमाडौं हिँडेका छन् । संसदमा दर्ता भएको विधेयकको मस्यौदा सार्वजनिक भएपछि नेपाल शिक्षक महासंघको आव्हानमा जिल्लाका पाँच सय शिक्षक आन्दोलनका लागि काठ्माडौं हिँडेका हुन् ।
बस, जीप र बाईक प्रयोग गरेर कतिपय शिक्षक काठ्माडौं पुगिसकेका छन् भने कतिपय शिक्षक जानेक्रममा रहेको नेपाल शिक्षक महासंघ खोटाङका अध्यक्ष मिनकुमार दाहालले बताए । अध्यक्ष दाहालका अनुसार दिक्तेल रुपाकोट मझुवागढी नगरपालिकाका १५० जना, ऐसेलुखर्क गाउँपालिकाको ४४ जना, बराहपोखरी गाउँपालिकाका २३ जना, जन्तेढुंगा गाउँपालिकाका २२ जना, साकेला गाउँपालिकाका १० जना, केपिलासगढीका ७ जना शिक्षक काठमाडौं पुगिसकेका छन् ।
रावाबेँसी गाउँपालिकाका ३२ जना धुलिखेलमा बास पुगेका छन् । खोटेहाङ गाउँपालिकाका १५ शिक्षक मुलकोटमा बास बसेका छन् । दिप्रुङ चुईचुम्मा गाउँपालिकाका १५ शिक्षक रातारात काठमाडौं जाँदैछन् । यस्तै, हलेसी तुवाचुङ नगरपालिकाबाट सय जना शिक्षक आन्दोलनमा सहभागी हुने अध्यक्ष दाहालले बताए । बुधबार खोटेहाङ गाउँपालिकाबाट ६५ जना र दिप्रुङ चुईचुम्माबाट ६/७ जनाको टोली काठमाडौं जाने महासंघले जनाएको छ ।
शिक्षक विद्यालय छाडेर आन्दोलनमा हिँडेपछि पठनपाठन प्रभावित भएको छ । अहिले शिक्षकको आन्दोलनका पक्ष र विपक्षमा वहस भइरहेको छ । हिउँदे वा अन्य बिदा कटाएर आन्दोलनको अवधि बराबरको पठनपाठन सञ्चालन गरिने अध्यक्ष दाहालले बताए ।
महासंघको कार्यक्रम अनुसार बुधबारदेखि सामुदायिक विद्यालयको पठनपाठन अनिश्चित कालसम्म बन्द हुनेछ । हाल संसदमा दर्ता भएको विधेयकको मस्यौदा सार्वजनिक भएपछि महासंघले त्यसमा गर्नुपर्ने सुधार बुँदागत रुपमा उल्लेख १८ वटा सुधारका माग शिक्षा, विज्ञान तथा प्रविधि मन्त्रालयलाई बुझाएको थियो ।
