- ट्रेण्डिङ:
खोटाङ । खोटाङको इलाका प्रशासन कार्यालय खोटाङबजारमा राष्ट्रिय परिचयपत्र स्थायी दर्ता स्टेशन स्थापना गरिएको छ । जिल्लाको दक्षिणी क्षेत्रमा पर्ने खोटेहाङ गाउँपालिका, जन्तेढुंगा गाउँपालिका र बराहपोखरी गाउँपालिकाका नागरिकलाई आफ्नै क्षेत्रबाट राष्ट्रिय परिचयपत्र दिलाउने लक्ष्यका साथ स्थायी दर्ता स्टेशन सञ्चालनमा ल्याइएको हो ।
खोटेहाङ गाउँपालिका ७ खोटाङबजारमा रहेको इलाका प्रशासन कार्यालयमा शुक्रबार प्रतिनिधिसभा सदस्य रामकुमार राईले राष्ट्रिय परिचयपत्र स्थायी दर्ता स्टेशन उद्घाटन गरेका छन् । हालसम्म दिक्तेलस्थित जिल्ला प्रशासन कार्यालयको दर्ता (स्टेशन) बाट मात्र राष्ट्रिय परिचयपत्र वितरण हुँदैआएकोमा इलाका प्रशासन कार्यालयबाट पनि सो सेवा सुरु गरिएको हो ।
दर्ता स्टेशन उद्घाटन लगत्तै कार्यक्रमका प्रमुख अतिथि एवम् प्रतिनिधिसभा सदस्य रामकुमार राईले जन्तेढुङ्गा–२, बोपुङका ३२ बर्षीय रबिन राईलाई राष्ट्रिय परिचयपत्र हस्तान्तरण गरेपछि उक्त राष्ट्रिय परिचयपत्र वितरणको काम सुरु गरिएको इलाका प्रशासन कार्यालय खोटाङबजारका प्रमुख मोहनबहादुर राईले बताए ।
पैदल दुई दिनसम्म हिँडेर दिक्तेल पुगेर राष्ट्रिय परिचयपत्र बनाउँदै आएका तीन पालिकाका २१ वडाका नागरिकको सहजताका लागि खोटाङबजारबाट राष्ट्रिय परिचयपत्र वितरणको प्रवन्ध मिलाइएको हो । राष्ट्रिय परिचयपत्र स्थायी दर्ता स्टेशनबाट बराहपोखरी र जन्तेढुंगा गाउँपालिकाका नागरिक सबैभन्दा बढी लाभान्वित भएका छन् ।
राष्ट्रिय परिचयपत्र वितरण सेवा प्रवाहका लागि गृहमन्त्रालयले एक जना अपरेटर पठाएको छ । इलाका प्रशासन कार्यालयले करारमा थप एक जना दर्ता सहायक नियुक्त गरेको छ । राष्ट्रिय परिचयपत्र नागरिकको वैयक्तिक तथा जैविक विवरण समावेश भएको राष्ट्रिय पहिचान सहितको बायोमेट्रिक सुविधायुक्त र बहुउपयोगी प्रमाणपत्र हो ।
राष्ट्रिय परिचय पत्रमा व्यक्तीको नाम, थर, जन्म मिति, लिङ्ग, आमाबुबाको नाम, ठेगाना, नागरिकताको किसिम, पतिरपत्नीको नाम, बाजेको नाम लगायतका व्यक्तीगत विवरण देखि औंलाको छाप, आँखाको नानी, परिचय नम्बर, फोटो, राष्ट्रियता, हस्ताक्षर लगायत समावेश गरिन्छ ।
राष्ट्रिय परिचयपत्र स्थायी दर्ता स्टेशन उद्घाटनका क्रममा प्रमुख जिल्ला अधिकारी सन्तबहादुर सुनार, खोटेहाङ गाउँपालिका अध्यक्ष उदिमबहादुर राई, उपाध्यक्ष रुपेश राई, जन्तेढुंगा गाउँपालिका उपाध्यक्ष खेमबहादुर खड्का, बराहपोखरी गाउँपालिका उपाध्यक्ष भुवलराज राई, नेकपा माओवादी केन्द्र खोटाङका संयोजक दिपक पाण्डे, नेकपा एमाले खोटाङका सचिवालय सदस्य राजन बञ्जरा, भगवती मावि खोटाङबजारका प्रधानाध्यापक कुमार पराजुली, नेपाल पत्रकार महासंघ खोटाङका अध्यक्ष दिलीप खत्री, खोटेहाङ, जन्तेढुंगा र बराहपोखरी गाउँपालिकाका जनप्रतिनिधि लगायतको उपस्थिति रहेको थियो ।
