- ट्रेण्डिङ:
खोटाङ, ५ पुस । जाडो बढ्न थालेसँगै खोटाङको केपिलासगढी गाउँपालिकाले ज्येष्ठ नागरिकलाई ज्याकेट वितरण सुरु गरेको छ ।
महिला, वालबालिका तथा ज्येष्ठ नागरिक शाखामार्फत गाउँपालिकाले ७६ वर्षदेखि ८० वर्षसम्मका ज्येष्ठ नागरिकलाई ज्याकेट वितरण सुरु गरेको हो । पुस ४ गते केपिलासगढी गाउँपालिका–१ फेदीका ज्येष्ठ नागरिकलाई ज्याकेट वितरण गरिएको छ ।
वडा कार्यालयमा आयोजित कार्यक्रममा गाउँपालिकाका उपाध्यक्ष गुरुराज राई र वडाध्यक्ष निरकुमार राईले ज्येष्ठ नागरिकलाई ज्याकेट वितरण गरेका थिए ।
केपिलासगढी गाउँपालिकामा सात वडा छन् । क्रमशः सबै वडाका गरी चार सय ज्येष्ठ नागरिकलाई ज्याकेट वितरण गरिने गाउँपालिका उपाध्यक्ष राईले बताए ।
गत वर्ष ८० वर्षमाथिका ज्येष्ठ नागरिकलाई ज्याकेट वितरण गरिएको थियो ।
