- ट्रेण्डिङ:
खोटाङ । नेपाली कांग्रेस केन्द्रीय सदस्य सुवाशकुमार पोखरेल र पूर्व वन राज्य मन्त्री शिवकुमार बस्नेत मतदान गर्न जिल्ला आएनन् ।
बिहीबार सम्पन्न प्रतिनिधिसभा सदस्य निर्वाचनमा नेताद्वय मतदान गर्न आफ्नो जिल्ला खोटाङ नआएपछि कांग्रेसभित्र चर्चा सुरु भएको कांग्रेस श्रोतले जनाएको छ ।
जिल्लाका अन्य शीर्ष नेताहरू भने आ–आफ्नो मतदान केन्द्रमा पुगेर मताधिकार प्रयोग गरेका थिए। खोटाङमा ४३ प्रतिशत मत खसेको छ । ३० हजार ३५ महिला र ३३ हजार पुरुष गरी ६३ हजार ३५ मत खसेको हो ।
मुख्य निर्वाचन अधिकृत फणिन्द्रप्रसाद पराजुलीका अनुसार जिल्लाभरका एक सय ३६ मतदानस्थलकै मतपेटिका ल्याउने काम भइरहेको छ ।
शुक्रबार विहान १० बजेसम्म सबै मतपेटिका सङ्कलन भइसक्ने र त्यसपछि सर्वदलीय बैठक राखेर मतगणना सुरु हुने पराजुलीले सुनाएका छन् ।
शान्तिपूर्ण रूपमा मतदान सम्पन्न भएको प्रमुख जिल्ला अधिकारी रेखा कँडेलले जनाएकी छन् ।
