- ट्रेण्डिङ:
पोखरा । गण्डकी प्रदेशको मुख्यमन्त्रीमा पुनः नियुक्त भएका पृथ्वीसुब्बा गुरुङले पद तथा गोपनियताको सपथ लिएका छन् । उनलाई प्रदेश प्रमुख सीता पौडेलले सपथ गराएकी हुन् ।
गुरुङले राजीनामा दिएपछि प्रदेश प्रमुख पौडेलले ३ दिनको समय दिएर प्रदेशसभाका दलहरुलाई बहुमतको सरकार गठनको दावी पेश गर्न आह्वान गरेकी थिइन् ।
विपक्षी गठबन्धनका तर्फबाट कांग्रेस प्रदेशसभा संसदीय दलका नेता कृष्णचन्द्र नेपाली पोखरेलले बुधबार आफूलाई चार दलका ३१ सांसदको समर्थन रहेको पत्र प्रदेश प्रमुखको कार्यालयमा दर्ता गराएका थिए । तर, राष्ट्रिय जनमोर्चाका सांसदद्वय कृष्ण थापा र खिमबिक्रम शाहीले आफूहरू नयाँ गठबन्धनमा नरहेको पत्र प्रदेश प्रमुखलाई पठाएपछि बहुमत पुग्न नसकेपछि पुनः नेकपा एमाले संसदीय दलका नेता समेत रहेका गुरुङले पुनः मुख्यमन्त्री पदमा बाजी मारेका हुन् ।
प्रदेश प्रमुख पौडेलले पोखरेलको दावी नपुग्ने भन्दै संविधानको धारा १६८ (३) अनुसार गुरुङलाई अल्पमतको सरकारको मुख्यमन्त्रीको रुपमा नियुक्त गरेकी हुन् । अब मुख्यमन्त्री गुरुङले एक महिनाभित्रमा प्रदेशसभामा विश्वासको मत लिनुपर्नेछ ।
