- ट्रेण्डिङ:
खोटाङका कवि चक्रबहादुर राईको कविता संग्रह ‘गमला’ बिमोचन गरिएको छ । हलेसी तुवाचुङनगरपालिका–५ दुर्छिम निवासी कवि राईको कविता संग्रह शनिबार सोही नगरपालिकाका नगरप्रमुख इवन राईले विमोचन गरेका हुन् ।
२०६० सालमा कविता संग्रह ‘प्रतिमाको इतिहास’ लेखेका राईले माइली छोरी गमलाको वियोगमा छोरीकै नाममा कविता संग्रह तयार पारेका हुन् । नगरपालिकाको आर्थिक सहयोग र अदृश्य कला केन्द्रको समन्नयमा प्रकाशन गरिएको गमलामा ३३ वटा कविता समेटिएका छन् ।
गमलामा वियोगान्त सहित विभिन्न रसका कविता स्वादन गर्न सकिने कवि मनकुमार राई (अकेला यात्री) ले समिक्षा गरेका छन् । कवि राई राजनीतिकर्मी पनि हुन् ।
कार्यक्रममा नगरप्रमुख राईले साहित्यिक श्रष्टा र सृजनाको विकासमा नगरपालिकाले सदैव कदर र सहयोग गर्ने बताए । विमोचन कार्यक्रम अदृश्य कला केन्द्रका अध्यक्ष कुबेर राईको अध्यक्षतामा सञ्चालन गरिएको थियो ।
कार्यक्रममा कांग्रेसका जिल्ला कार्य समिति सदस्य चक्रकुमार राई, जनता समाजबादी पार्टीका नगरपालिका अध्यक्ष मविन्द्र राई लगायतको उपस्थिति थियो ।
